- अति तेथे माती - कोणत्याही गोष्टीचा अतिरेक वाईट असतो.
- अति शहाणा त्याचा बैल रिकामा - अति शहाणपण नुकसानकारक ठरते.
- आयत्या बिळात नागोबा - दुसऱ्याच्या श्रमाचा फायदा स्वत: साठी करुन घेणे.
- आगीतून फुफाट्यात - लहान संकटातून मोठ्या संकटात सापडणे.
- अंथरून पाहून पाय पसरावे - ऐपतीच्या मानाने खर्च करणे.
- आंधळा मागतो एक डोळा देव देतो दोन डोळे - अपेक्षेपेक्षा कितीतरी अधिक फायदा होणे.
- इकडे आड तिकडे विहीर - दोन्ही बाजूंनी अडचणीत सापडणे.
- उचलली जीभ लावली टाळ्याला - विचार न करता वाटेल ते बोलणे.
- उथळ पाण्याला खळखळाट फार - अंगी गुण थोडा असणारा बढाई मारतो.
- एका हाताने टाळी वाजत नाही - भांडणातील दोष एकाच पक्षाकडे असत नाही.
- झाकली मूठ सव्वा लाखाची - मौन पाळून अब्रू राखणे.
- कर नाही त्याला डर कशाला?- निरपराधी माणूस निर्भय असतो.
- कामापुरता मामा - काम साधण्यासाठी गोड बोलणारी व्यक्ती.
- नमनाला घडाभर तेल - एखादी गोष्ट सुरू करायला फार वेळ लागणे.
- नव्याचे नऊ दिवस - एखादी वस्तू नवीन असे तोवर तिचे कोडकौतुक करणे.
- नवी विटी नवे राज्य - सगळाच प्रकार नवीन सुरू करणे.
- नाव मोठे लक्षण खोटे - भपका मोठा पण प्रत्यक्षात वागणूक ढोंगीपणाची.
- नाचता येईना अंगण वाकडे - आपल्यातील कमीपणा झाकण्यासाठी दुसऱ्या वस्तूला नावे ठेवणे.
- नाक दाबले की तोंड उघडते - मर्मावर आघात केल्याशिवाय वठणीवर येत नाही.
- नाकापेक्षा मोती जड - कमी दर्जाच्या माणसाला अधिक महत्त्व येणे.
- नावडतीचे मीठ अळणी - नावडत्या माणसाने केलेली चांगली गोष्टदेखील वाईटच दिसते.
- पाचामुखी परमेश्वर - पुष्कळ लोक जे बोलतात तेच योग्य मानणे.
- पालथ्या घागरीवर पाणी - केलेल्या उपदेशाचा काहीही परिणाम न होणे.
- पायातली वहाण पायीच बरी - प्रत्येकाला त्याची योग्यता असेल अशा बेतानेच वागावे.
- पुढच्यास ठेच, मागचा शहाणा - दुसऱ्याचा अनुभव पाहून आपण त्यापासून धडा घेणे.
- पाचही बोटे सारखी नसतात - सर्वच व्यक्ती समान स्वभावाची किंवा योग्यतेची नसतात.
- प्रयत्नांती परमेश्वर - कितीही अवघड गोष्ट प्रयत्नांती साध्य होते.
- बैल गेला नि झोपा केला - एखादी गोष्ट टळून गेल्यावर त्यासाठी केलेली व्यवस्था व्यर्थ ठरते.
- बुडत्याचा पाय खोलात - माणसाची अवनती होऊ लागली म्हणजे ती सर्व बाजूंनी होऊ लागते.
- भित्यापाठी ब्रह्मराक्षस - भित्र्या व्यक्तीवर अनेक संकटे कोसळतात.
- भरवशाच्या म्हशीला टोणगा - ज्याच्याकडे खात्रीने अपेक्षा करावी त्याच्याकडून अपेक्षाभंग होणे.
- भीड भिकेची बहीण - भिडस्तपणा माणसाचे मोठे नुकसान करतो.
- भीक नको पण कुत्रा आवर - ज्याच्याकडे मदतीच्या अपेक्षेने जावे त्याच्याकडून मदत न मिळता, उलट संकट ओढवणे.
- मऊ सापडले म्हणून कोपराने खणू नये - एखाद्याच्या चांगुलपणाचा गैरफायदा घेऊ नये.
- मन चिंती ते वैरी न चिंती - आपल्या मनात जेवढ्या वाईट गोष्टी येतात तेवढ्या शत्रूच्या मनात येत नसतात.
- मेल्या म्हशीला मणभर दूध - मेलेल्या माणसाची खूप स्तुती करणे.
- मोर नाचतो म्हणून लांडोर नाचते - मुख्य व्यक्ती वागेल तसे वागणे.
- मांजराच्या गळ्यात घंटा कोणी बांधायची? - धोका पत्करायला कोणीही पुढे येत नाही.
- माकडाच्या हातात कोलीत - मूर्खाला नको ते अधिकार देणे.
- वासरांत लंगडी गाय शहाणी - अज्ञानी लोकांत अर्धवट शहाण्याला मोठेपण लाभते.
- वळणाचे पाणी वळणानेच जाणार - निसर्गनियमाने सर्व गोष्टी होतात.
- विनाशकाले विपरीत बुद्धी - विनाशकाल आला म्हणजे मनुष्याची बुद्धी फिरते.
- रात्र थोडी सोंगे फार - कामे पुष्कळ, पण ती पार पाडायला वेळ न पुरणे.
- चोराच्या मनात चांदणे - वाईट काम करणार्याच्या मनात भीती असते.
- घरोघरी मातीच्या चुली - सर्वत्र सारखीच परिस्थिती असणे.
- गाढवाला गुळाची चव काय? - मूर्खाला चांगल्या गोष्टीची किंमत कळत नाही.
- गोगलगाय नि पोटात पाय - एखाद्या चे खरे स्वरूप न दिसणे.
- दुरून डोंगर साजरे - दुरून चांगल्या दिसणाऱ्या गोष्टींचं खरे स्वरूप लक्षात येत नाही.
- दोघांचे भांडण तिसऱ्याचा लाभ - दोघांच्या वादात तिसऱ्या व्यक्तीच्या फायदा होतो.
- काखेत कळसा गावाला वळसा - हरवलेली वस्तू जवळ असताना सर्वत्र शोधत राहणे.
- कुर्हाडीचा दांडा गोतास काळ - आपल्याच नात्यातला आपला घात करतो.
- कोल्हा काकडीला राजी - शूद्र माणसे शुल्लक गोष्टीने संतुष्ट होतात.
- गर्वाचे घर खाली - घमेंडखोर माणसावर नाचक्कीची वेळ येते.
- गरज सरो वैद्य मरो - गरज संपल्यावर उपकार कर्त्याला विसरणे.
- जित्याची खोड मेल्याशिवाय जात नाही - मूळचा स्वभाव कधीच बदलत नाही.
- पळसाला पाने तीनच - कोठेही गेले तरी मनुष्य स्वभाव सारखाच.
- हातच्या काकणाला आरसा कशाला? - प्रत्यक्ष दिसणाऱ्या गोष्टीला पुराव्याची गरज नसते.